2021/03/15

 

Dimako Ugarana Herri Eskolan eta Bilboko Abusu Ikastolan loratu dira aurtengo Loraldia Eskolako ekimenak eta ikusgai izango dira Loraldia Festibalean

 
  • Martxoaren 19an taularatuko dituzte haur eta gazteek euren sormenak Bizkaia Aretoan.

 

  • “Jainkosaren Amalurra” pastorala eta “Kamera sartu” dira aurtengo ediziorako prestatu dituzten proposamenak.

 

  • Dimako Ugaran Herri Eskola eta Bilboko Abusu Ikastola izan dira aurtengo edizioan Loraldia Eskolan proiektuak landu dituztenak.

 

 

Loraldia Kultur Elkarteak Loraldia Eskola programan parte hartu duten bi ikastetxeen lanen aurkezpena iragarri du, Loraldia Festibaleko programazioaren baitan dagoen proposamena. 

Martxoaren 19an egingo dute, Bizkaia Aretoan. Aurtengo honetan, Dimako Ugaran Herri Eskolan ta Bilboko Abusu Ikastolan loratu dira proiektuak. 

 

Loraldia Kultur Elkarteak Loraldia Eskola ipini zuen abian euskal kulturaren transmisioa haur eta gazteen artean sustatzeko, eta ikasturtean zehar proiektu ezberdinak bideratu dira zenbait ikastetxetan. Loraldia Festibalean horietako bien emaitzak plazaratzeko tenorea heldu da, ikasturte honetan martxan jarri izan direnak, hain zuzen ere.


Haur eta gazteen artean euskal kulturaren transmisioa sustatzen duen Loraldia Eskola programa honek Bizkaiko Foru Aldundiaren Euskara sailaren babesa du.

Jainkosaren Amalurra

 

Dimako Herri Eskolak pandemiaren zailtasunak gainditu eta sormen-ahalegin handia egin du. Zehazki, Zuberoako Pastorala formatua gaurkotu eta Amalurraren defentsa helmuga, mitologiaren sinesmenetan murgildu dira ikasleak. Hala, “Jainkosaren Amalurra” Pastorala taularatuko dute. Lehen Hezkuntzako 5. eta 6. ikasturteko haurrak izango dira protagonistak.

 

Kamara sartu

 

Bilboko Abusu Ikastolak ere prestatu du aurtengo ediziorako proposamen bat. “Kamara Sartu” izeneko proiektua garatu dute bertako Bigarren Hezkuntzako ikasleek. Gaurko kultura ardatz hartuta, ikus-entzunezkoen bitartez, gazteen begirada aurkeztuko dute.  

 

 

Loraldia Eskola

 

Gaurko gazte eta haurrak biharko gure kulturaren errealitatea eratuko dute. Beraz, gure ahalegina da gazteak eta haurrak txertatzea euskarazko kulturaren unibertsoan, eduki erakargarri, integratzaile eta ospetsu batekin identifikatuz.

Haur eta gazte horien artean euskal kulturaren transmisioa sustatzeko helburuarekin jarri zen abian Loraldia Eskola. Eskola garaian dauden ume eta gazteentzat bereziki egindako programazioa eskaintzen du Loraldia Festibalak, egungo gazteen motibazioekin, baliabideekin eta errealitateekin konektatzen duena.