2020/03/11
MUSIKA ETA TEATROA
IPARRAGIRRE
Bihotzeko Jose Mari
Iparragirre 1820an munduratu zen, beraz 2020. urtean sortu zenetik 200 urte ospatuko dugu. Hori dela eta, , bi kultur enpresa, TANTTANKA TEATROA eta DEMODE QUARTET, eta kultur elkartea bat, LORALDIA, elkartzen dira sormen-lan bat plazaratzeko asmoarekin: “IPARRAGIRRE, bihotzeko Jose Mari” kontzertu eszenikoa.
ELKARLANA:
TANTTAKA + DEMODE QUARTET + LORALDIA PRODUKZIOAK
Tanttaka Teatroa, Demode Quartet eta Loraldia Produkzioak elkarlanean ari dira kontzertu eszeniko hau plazaratzeko. Lan funtzioak banatu ditugu: Tanttakak zuzendaritza
artistikoaren ardura gidatuko du, Demode Quartetek zuzendaritza musikala burutuko du eta Loraldia Produkzioak-ek ekoizpena diseinatuko du.
KONTZERTU ESZENIKOA
Sustatuko dugun sormena arte eszeniko eremuan kokatzen da. Teatro-lan honek kontzertu bat eskainiko du, Iparragirreren ekarpen musikala erdigunean kokatuko baitugu. Bardoaren kantak moldaketa garaikidearen bidez aurkeztuko dira.
Iparragirrek hamaika kanta bikain sortu zituen. Horietako asko bi mende ondoren herriak kantatzen ditu maiz. Horrez gain, batzuk ereserki bihurtu dira. Beraz, arlo musikalak leku nabarmena izango du.
EMAKUMEAK PROTAGONISTA
Dramaturgiari dagokionez, Iparragirreren bizitzan nabarmendu ziren emakumeak
bilduko ditugu eta sormenaren protagonistak (ama, emaztea, Parisen ezagutu zuen
sopranoa, Manuela, alabak…) izango dira. Emakume hauek Iparragirreren bizipenak
ekarriko dituzte gogora eta euren begirada eskainiko digute. XIX. mendeko gizartea (gerra karlistak, emigrazioa, euskaltasuna…) islatuko da bardoaren bizi-pasarteak errepasatuz.
Teatro-lanaren gidoiari dagokionez, emakumeek Iparragirreri bidalitako eskutitzek osatuko dute aktoreen testua. Fikziozko eskutitzak izango dira eta idazki guztien artean Urretxuko bardoaren biziaren puzzlea osatuko da.
HIRU AKTORE ETA MUSIKARI BAT
Hiru emakume izango dira aktore-kantari lanetan: Joli Pascualena, Ainara Ortega, Ane Gabarain. Iparragirreren aulkian, berriz, Angel Unzu gitarra-jotzailea izango da.
Aktoreek Iparragirreri bidalitako eskutitzak irakurriko dituzte eta baita bardoaren kantuak abestu ere. Beraz aktore-kantariak ditugu.
Anjel Unzuk, berriz, musika jarriko dio ikuskizunari gitarrarekin. Itzal luzeko musikari hau gitarra-jotzale bikaina da eta Iparragirreren sormen musikalari begirada garaikidea emango dio. Angel Unzu zuzen zuzenean joko du eszenatokian.
HIRU TESTUGILE
Eskutitzen tesuak osatzeko bi idazle gonbidatu ditugu: Aizpea Goenaga eta Arantza
Iturbe. Biak eskarmentu handiko teatrogileak dira. Honez gain, Iñigo Legorburuk idatzi
zuen “Ameriketatik” eskutitz saritua izango dugu abiapuntua. Beraz hiru testugile
bildu ditugu ekoizpen honetan: Aizpea Goenaga, Arantza Iturbe eta Iñigo Legorburu.
ESZENA: AULKIAK
Eszenari dagokionez, aulkia izango da irudi nagusia. 80 aulki baino gehiagok osatuko
dute eszenografia. Aulki-bide honetan eskutitzak aurkituko dituzte aktore-kantariek.
Eta aulki baten gainean Iparragirre (Angel Unzu) izango da gitarra jotzen. Aulkia
bizitzaren etapen metafora gisa aurkezten da.
Angela Kerexeta emazteak
Uruguatik Iparragirreri
bidali zion eskutitzaren hasiera
AMERIKETATIK 1842ko Ilbeltzaren zazpigarrenian
Etsiyak artuta, munduko bazter ontatik eskribitzeko aintzen dit biyotzak. Edo, obeto esanda, ezin eamanezko biyotzeko miñ latz onek. Izan e, euskal lurrian zaudenetik, lurra jota dagona ni neoni bainaiz. Madarikatu dittut milla aldiz azkeneko egun otan zukin atarramentu onik ez nula izango esan ziaten aik. Ne erriya dan Alegi matte artako jendiak, arrazoyan jabe ziala; alegiya.
Azkenian, zuria ta zuria eittekotan ziñala… ta ara! Ementxe utzi nazu 9 umeren jabe! Ara nun diran nik e kantatuko nizuke gustoa asko, goizero-goizero gosiak jota zutaz galdezka esnatu ta aidi ze emanik ez dedanian. “Gernikako arbola-ren lurraldian” eantzuten diyet malkotan urtu biarrian, eta Ume eder bat kantatutzen asten natzaye, ala gosiak daudela aztuko zayelakuan.
EKOIZPENAREN ABIAPUNTUA
Eusko Jaurlaritzaren laguntza izango dugu eta hauxe bera da ekoizpenaren
abiapuntua. Horrez gain, Urretxuko udalari, Gipuzkoako Aldundiari eta bestelako eragile kulturalei laguntza eskatzeko asmoa dago. Elkarlana baita gure lan egiteko modua.
ESTREINALDIA ETA BIRA
Martxoaren 11n, asteazkenarekin, arratseko 19:30ean, Bilboko Arriaga Antzokikoan
estreinatuko da, Loraldia Festibalean.
Loraldia Festibalaren zabalera ekitaldia izango da eta estreinatu ondoren Euskal
Herrian zehar bira bat antolatzen ari gara. Eraman dezagun kontzertu eszeniko hau
euskal aretoz areto, Iparragirreren memoria merezi du-eta.
FITXA ARTISTIKOA
Ekoizpena Tanttaka teatroa, Demode Quartet, Loraldia Festibala
Zuzendaritza artistikoa Fernando Bernues (Tanttaka Teatroa)
Zuzendaritza musikala Joli Pascualena (Demode Quartet)
Ekoizpen koordinazioa Aitor Narbaiza (Loraldia Produkzioak), Imanol Agirre (Loraldia Produkzioak)
Testugileak Aizpea Goenaga, Arantza Iturbe, Iñigo Legorburu
Aktore-kantariak Joli Pascualena, Ainara Ortega, Ane Gabarain
Musikaria Angel Unzu
Kartelaren diseinua Unai Molina (Loraldia Produkzioak)
Komunikazioa Amaia Ocerin (Loraldia Produkzioak)
Ekitaldiaren argazkia
Loraldia produkzioaken bideo guztiak
Loraldia Produkzioak
7 Videos
