25 Jan Loraldia Kultur Elkarteak datozen hiru urterako egitasmo estrategikoak aurkeztu ditu
- Loraldia GARA. Zerumuga begietan ekitaldia ospatu du Loraldia Kultur Elkarteak Itsasmuseumen. 10. urtemugara begira, datozen hiru urtetan martxan jarriko dituen egitasmo estrategikoak aurkeztu ditu.
- Loraldia Kultur Elkarteak Loraldia festibala antolatzen du; 2022an 8. edizioa burutuko da. Baina honetaz gain baditu beste egitasmo batzuk eta proiektu berriak martxan jarriko ditu baita ere.
- Ekitaldiak Lorazainak, erakundeak, babesleak, enpresa mundua, gizartearen arlo ezberdinetako ordezkariak eta kultur sektoreko profesionalak bildu ditu. Inun musikariak Txinba disko berriaren aurkezpena egin du.
Loraldia Kultur Elkarteak 10. urtemuga beteko du 2024an. Hori dela eta 2022-24 urteetan garatuko dituen egitasmoak aurkeztu ditu Loraldia GARA. Zerumuga begietan ekitaldi sozialean. Aurkezpen honetan elkarteko sei kideek parte hartu dute eta ekintza sozial eta kultural xumea egin dute Itsasmuseumen.
Honetan, datozen hiru urtetan garatuko dituen egitasmo estrategikoak aurkeztu ditu; 2022ko Loraldia Festibalaren 8. edizioaren zertzelada nagusiak komunikatu ditu; eta kultur emankizuna eskaini du baita ere: Inun musikariak Txinba disko berria aurkeztu du.
Loraldia Kultur Elkartearen egitasmoak
Elkarteak proiektu ilusionagarri berriak sortzen, imajinatzen eta abian jartzen jarraitu nahi du. Euskal sorkuntza erdigunean jarriz eta sortzaileak, ikusleak eta beste kultur eragileak batuko dituzten egitasmoak sortuz aurrerapauso bat eman nahi du. Geroari begiratzeko modu berri bat.
Loraldiak hamaika aurpegi ditu eta 10. urteurrena zerumugan duela, ikuspegi ezberdinetako arragoa koloretsua lantzeari ekingo dio:
Festibala
Loraldia Festibala da elkartearen egitasmorik ezagunena, urtero, martxoan Bilbon udaberriari ongi etorria ematen diona.
Festibalak Bilbon eskaintzen duen babes-lekua sortzaileen portua da. Sormena da etorkizun-bidea eta Euskal Kultura garaikidea aldarrikatzen dugu lau haizetara.
Baina elkarteak baditu beste ekimen batzuk martxan eta datozen urtetan proiektu berriei ekingo die baita ere.