Loraldiak Lekeitioko Sormen Astea kultur ekintzen agenda antolatu du hirugarrenez Lekeition
- Loraldiak Lekeitioko Sormen Astea kultur ekintzen agenda antolatu du Lekeition, ekainaren 24a eta 28a bitartean.
- Sormen Astean euskal kulturaren zenbait erreferentek parte hartuko dute, Maialen Lujanbio, Anari edota Gari, besteak beste.
Lekeitiok Sormen Astearen 3. edizioa hartuko du ekainaren 24a eta 28a bitartean. Kultur ekintzen programazio anitza eta oparoa da, erreferente diren sortzaileak bilduko dituena eta arlo ezberdinak jorratuko dituena. Izan ere, musika, literatura, performance-a, dantza eta zinea eskainiko dira.
Publiko orokorrari zuzenduta, bost egun horietan kultur erreferente handiak izango ditugu Lekeition: Unai Elorriaga, Josu Aurrekoetxea, Gari, Maialen Lujanbio, Anari eta Dantzaz konpainia. Kultur proposamenak berritzaileak izango dira ere eta proposamen ez ohikoak ikusteko aukera izango ditugu.
Programazio anitza bost egunez
“Ikusten da porturik? Ez dugu ikusten baina imaginatzen dugu; imaginatzen dugu eta haruntz goaz arraunean.” Horrela idatzi zuen Joseba Sarrionandiak, Ines Osinagak kanta bihur dezan, eta horrela imaginatzen dugu euskal sortzailea bere bakardadean.
Lekeitioko sormen aste honek egundoko aukera ematen du sortzailea gertutik ezagutzeko eta gozatzeko. Formatu txikiko ikuskizunak dira. Gehienetan biluzik. Erabat garaikideak. Sormen hauek zuzen eta artez galdetzen diote ikuslearen bihotzari, hunkitzeraino. Harremana estua da. Dena flasko txikian, garestiak diren lurrinak bezalaxe.
Ekintzetarako sarrerei dagokionez, salmenta hasi da loraldia.eus webgunearen bitartez.
Loraldiak antolatutako jardueretarako sarrerak saltzeko sistema berria
Loraldiak etengabe egiten du lan hobekuntzaren alde. Prozesu horren alderdi garrantzitsu bat digitalizazioari buruzkoa da.
Eta arlo honetan, Loraldiak ekitaldi eta jardueretarako sarrerak online saltzeko mikrosite espezifiko berri bat garatu du.
Sarrerak.loraldia.eus webgunetik sarrerak erosi ahal izango dira eta, berrikuntza gisa, Lorazainek eserlekuak aukeratu ahal izango dituzte. Hori zen erakundearen helburuetako bat eta Lorazainak komunitatea osatzen duten pertsonen eskaera handiena.
